នៅព្រឹកថ្ងៃសុក្រ ៧រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៦ ខែតុលា ឆ្នាំ២០២៣ វេលាម៉ោង ០៨:៣០ នាទីព្រឹក នៅសាលមហោស្រពកោះពេជ្រ រាជធានីភ្នំពេញ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត បានយាងជាព្រះរាជាធិបតីភាពដ៏ខ្ពង់ខ្ពស់បំផុត ក្នុងព្រះរាជពិធីអបអរសាទរទិវារំលឹកខួប ៣០ឆ្នាំ នៃការប្រកាសឱ្យប្រើរដ្ឋធម្មនុញ្ញនៃព្រះរាជាណាចក្រកម្ពុជា (ថ្ងៃទី២៤ ខែកញ្ញា ឆ្នាំ១៩៩៣ - ថ្ងៃទី២៤ ខែកញ្ញា ឆ្នាំ២០២៣) ដោយមានការយាង និង អញ្ជើញចូលរួមពីសម្តេចវិបុលសេនាភក្តីប្រធានព្រឹទ្ធសភា ឯកឧត្តមកិត្តិសេដ្ឋាបណ្ឌិតប្រធានរដ្ឋសភាស្តីទី សម្តេចមហាបវរធិបតីនាយករដ្ឋមន្ត្រី សម្តេចអគ្គមហាពញាចក្រីប្រធានកិត្តិយសក្រុមឧត្តមប្រឹក្សាផ្ទាល់ព្រះមហាក្សត្រ សម្តេចអគ្គមហាសេនាបតីតេជោប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេច ទ្រង់ ឯកឧត្តម លោកជំទាវ សមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល ក្រុមប្រឹក្សាធម្មនុញ្ញ ឯកឧត្តម លោកជំទាវ ឯកអគ្គរាជទូត ឯកអគ្គរដ្ឋទូត ភ្ញៀវកិត្តិយសជាតិនិងអន្តរជាតិ យ៉ាងច្រើនកុះករ។ ឯកឧត្តមកិត្តិនីតិកោសលបណ្ឌិត អុឹម ឈុនលឹម ប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា បានអញ្ជើញថ្លែងសុន្ទរកថាអំពីសមិទ្ធផលធម្មនុញ្ញ ដែលសម្រេចបានក្នុងរយៈពេល៣០ឆ្នាំ ថ្វាយព្រះមហាក្សត្រ និង អង្គព្រះរាជពិធី (ខ្លឹមសារលម្អិតមានក្នុងសុន្ទរកថារបស់ឯកឧត្តមកិត្តិនីតិកោសលបណ្ឌិតប្រធានក្រុមប្រឹក្សាធម្មនុញ្ញ)។ បន្ទាប់ពីឯកឧត្តមកិត្តិនីតិកោសលបណ្ឌិតប្រធានក្រុមប្រឹក្សាធម្មនុញ្ញ ថ្លែងអំពីសមិទ្ធផលធម្មនុញ្ញ ដែលសម្រេចបានក្នុងរយៈពេល៣០ឆ្នាំរួចហើយ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ស្តេចយាងប្រទានព្រះរាជសុន្ទរកថាជូនអង្គព្រះរាជពិធី (ព្រះរាជខ្លឹមសារលម្អិតមានក្នុងព្រះរាជសុន្ទរកថាព្រះមហាក្សត្រ)៕
06 តុលា 2023