នៅព្រឹកថ្ងៃចន្ទ ៥កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី២៤ ខែមេសា ឆ្នាំ២០២៣ នៅសាកលវិទ្យាល័យជាតិគ្រប់គ្រង ឯកឧត្តមកិត្តិនីតិកោសលបណ្ឌិត អុឹម ឈុនលឹម ប្រធានក្រុមប្រឹក្សាធម្មនុញ្ញ បានអញ្ជើញអធិបតីដ៏ខ្ពង់ខ្ពស់ក្នុងការបើកវិញ្ញាសាប្រឡងជ្រើសរើសមន្ត្រីរាជការចូលបម្រើការងារនៅអគ្គលេខាធិការដ្ឋានក្រុមប្រឹក្សាធម្មនុញ្ញចំនួន ១៤រូប ដោយមានការអញ្ជើញចូលរួមពីថ្នាក់ដឹកនាំ និងមន្ត្រីរាជការនៃអគ្គលេខាធិការដ្ឋានក្រុមប្រឹក្សាធម្មនុញ្ញ និងសាកលវិទ្យាល័យជាតិគ្រប់គ្រង ជាគណៈកម្មការ និងអនុគណៈកម្មការរៀបចំការប្រឡង។ សូមបញ្ជាក់ថា : ការប្រឡងជ្រើសរើសមន្ត្រីរាជការចូលបម្រើការងារនៅអគ្គលេខាធិការដ្ឋានក្រុមប្រឹក្សាធម្មនុញ្ញចំនួន ១៤រូប សម័យប្រឡងថ្ងៃទី២៤ ខែមេសា ឆ្នាំ២០២៣ រៀបចំឡើងដើម្បីជ្រើសរើសមន្ត្រីផ្នែកនីតិសាស្ត្រចំនួន ១២រូប និងមន្ត្រីផ្នែកភាសាអង់គ្លេសចំនួន ០២រូប មានបេក្ខជនចុះឈ្មោះប្រឡងសរុបចំនួន ៣៨៤នាក់ ស្រី ១៣២នាក់ ក្នុងនោះបេក្ខជនផ្នែកនីតិសាស្ត្រ មានចំនួន ៣៣៥នាក់ ស្រី ១១៥នាក់ ចែកចេញជា ១៣បន្ទប់ និងបេក្ខជនផ្នែកភាសាអង់គ្លេស មានចំនួន ៤៩នាក់ ស្រី ១៧នាក់ ចែកចេញជា ០២បន្ទប់ នៅមណ្ឌលប្រឡងសាកលវិទ្យាល័យជាតិគ្រប់គ្រង ។